Áhöfn Normu Mary slökkti eld um borð

Rétt viðbrögð 19 manna áhafnar Normu Mary komu í veg fyrir að illa færi í gær þegar eldur kom upp um borð á vinnsludekki togarans, þar sem hann var á þorskveiðum í Barentshafi.  Enginn slasaðist í aðgerðunum og búið var að ráða niðurlögum eldsins þegar Norska strandgæslan kom til aðstoðar.  Skipið mun halda til hafnar á Akureyri innan tíðar eða þegar Norska strandgæslan hefur fullvissað sig um að ekki sé hætta á að eldurinn kvikni að nýju.  Á Akureyri verða  skemmdir skoðaðar og metnar áður en  viðgerð hefst.

„Það er alltaf mikil hætta þegar eldur kemur upp í skipi úti á sjó.  Við erum fyrst og fremst þakklátir réttum viðbrögðum áhafnarinnar sem kom í veg fyrir að ekki fór verr um borð í Normu“, segir  Óskar Ævarsson útgerðarstjóri Onward  Fishing.

Norma Mary er togskip í eigu Onward Fishing Company í Skotlandi sem er dótturfélag Samherja hf.

Virðingarfyllst

Haraldur Grétarsson

Framkvæmdastjóri Onward Fishing