Nýr Vilhelm sjósettur

Nýr Vilhelm Þorsteinsson EA var sjósettur hjá skipasmíðastöðinni Kar­sten­sens Skibsværft í Gdynia í Póllandi hinn 12. júní síðastliðinn. Skrokkurinn var tilbúinn til sjósetningar fyrir átta vikum en vegna Covid-19 heimsfaraldursins var ekki að ráðist í hana fyrr en nú.

Skipið mun leysa af hólmi núverandi Vilhelm Þorsteinsson EA 11 sem kom nýr til landsins fyrir tveimur áratugum. Burðargeta skipsins verður um 3.000 tonn af kældum afurðum.

„Um er að ræða nýsmíði sem við höfum beðið eftir með töluverðri eftirvæntingu. Skrifað var undir samninga vegna smíði skipsins hinn 4. september 2018 en þann dag hefðu tvíburarnir Baldvin og Vilhelm Þorsteinssynir orðið 90 ára. Búnaður skipsins verður einstaklega góður, bæði hvað varðar veiðarnar sjálfar og meðferð aflans en einnig hvað varðar vinnuaðstöðu og vistarverur áhafnar,“ segir Kristján Vilhelmsson, framkvæmdastjóri útgerðarsviðs Samherja hf.

Sjósetningin fer þannig fram að hjólabúnaður er settur undir skrokkinn og hann „keyrður“ út á stóran flotpramma sem er síðan dreginn frá bryggjunni og út á nægilegt dýpi. Sjó er þá dælt í tanka prammans þannig að hann fer á kaf nægilega mikið til þess að skipið fljóti. Það er síðan dregið aftur að bryggju við skipasmíðastöðina.

Í byrjun síðustu viku, eftir sjósetninguna, voru tvær aðalvélar skipsins, stýrishúsið með einni íbúðarhæð undir og radarmastrið sett um borð. Nokkurra daga vinna er eftir við skipið í Gdynia en það verður svo dregið til Skagen í Danmörku og smíðin kláruð þar. Er búist við að smíði skipsins ljúki vel fyrir jól.

Starfsmenn Karstensens tóku myndband af sjósetningu Vilhelms Þorsteinssonar EA. Hlekkur á myndbandið: Sjósetning Vilhelms Þorsteinssonar EA.

 

Vilhelm_Thorsteinsson_i_Hardbak

Togarinn, líkt og forveri hans, er nefndur eftir Vilhelm Þorsteinssyni, skipstjóra, en hér er hann á sínum yngri árum um borð í Harðbak

Vilhelm_Thorsteinsson_EA_undirritun_nysmidasamninga

Þorsteinn Már Baldvinsson og Kristján Vilhelmsson skrifa undir samning um smíði á nýjum Vilhelm Þorsteinssyni EA 4.september 2018.

Vilhelm_Thorsteinsson_EA_sjosettur

Vilhelm Þorsteinsson færður yfir á sjósetningarprammann

Vilhelm_Thorsteinsson_EA_sjosettur

Kominn á sjósetningarprammann

Vilhelm_Thorsteinsson_EA_sjosettur

Á leið út fyrir höfnina

Vilhelm_Thorsteinsson_EA_sjosettur

Kominn á flot!

Vilhelm_Thorsteinsson_EA_sjosettur

Á leið að bryggju

Vilhelm_Thorsteinsson_EA_sjosettur

Á leið að bryggju eftir sjósetningu

Vilhelm_Thorsteinsson_EA_sjosettur

Stýrishúsið híft um borð í nýjan Vilhelm Þorsteinsson EA

Vilhelm_Thorsteinsson_EA_sjosettur

 

Vilhelm_Thorsteinsson_EA_sjosettur

Stýrishús og radarmastur komin á