Fréttir

Kaupþing hf. seldi í dag 13,5% hlut í Samherja.  Kaupendur voru Fjárfestingafélagið Skel (6,53%), Fjárfestingafélagið Gaumur (3,43%) og Fjárfestingafélagið Fjörður (3,09%).

Í dag var skrokkur hins nýja fjölveiðiskips Samherja sjósettur í Gdansk í Póllandi. Stjórnendur fyrirtækisins fylgdust með athöfninni í blíðskaparveðri og gekk hún eins og best verður á kosið. Skipið mun bera nafnið Vilhelm Þorsteinsson EA-11 en því hefur þó ekki enn verið gefið nafnið formlega.

Í tímaritsviðtali sem birtist í gær er haft eftir Þorsteini Vilhelmssyni fyrrum útgerðastjóra og eins aðaleiganda Samherja hf. að fréttatilkynning sem gefin var út af félaginu 9. júní 1999 í tilefni af starfslokum hans hafi ekki verið sannleikanum samkvæm.

Í sjónvarpsfréttum í gær, þar sem fjallað var um ummæli Þorsteins Vilhelmssonar í tímaritsviðtali, var haft eftir framkvæmdastjóra Verðbréfaþings Íslands (VÞÍ) "að mál sem snúa að vísvitandi broti á upplýsingaskyldu hafi ekki komið upp hér á landi áður", eins og sagði orðrétt í umræddri frétt. Var þar vísað í fréttatilkynningu af starfslokum Þorsteins Vilhelmssonar.

Kaupþing hf. keypti í dag 21,6% hlut Þorsteins Vilhelmssonar í Samherja.   Bréfin voru keypt á genginu 10,67 og nemur kaupverð þeirra rúmlega þremur milljörðum króna.

Þessar skemmtilegu myndir af Vilhelmi Þorsteinssyni EA-11 voru teknar af Stefáni P. Haukssyni yfirvélstjóra s.l. laugardag (27. janúar) fyrir utan Krísuvíkurbjarg og sýna Vilhelm össla í land með rúm 2.400 tonn af loðnu um borð. Farminum var landað í Grindavík hjá Samherja - Fiskimjöl og lýsi þar sem hann fór í bræðslu. Fyrir áhugasama um skipið er vert að benda á vefsíðu sem Gunnar Gunnarsson háseti um borð hefur komið á fót. Þar er að finna ýmsar myndir og upplýsingar um skip og áhöfn. Slóðin er www.simnet.is/gunnig

Samherji hf. hefur gengið frá sölu á öllum hlutabréfum félagsins í Skagstrendingi hf. Eignarhlutur Samherja var 40,57% eða krónur 127.126.478 að nafnvirði. Söluverð bréfanna var ríflega 1.334 milljónir króna sem er tæplega 300 milljónum króna hærra en Samherji greiddi fyrir eignarhlutinn. Kaupandi bréfanna var Kaupþing hf.

Samherji hf. hefur keypt ríflega 31% hlut í Hraðfrystistöð Þórshafnar hf. Bréfin eru keypt af Þórshafnarhreppi og Landsbanka Íslands hf.