Fréttir

Samherji hf. og dótturfyrirtæki þess og söluskrifstofa í Bretlandi, Seagold Ltd. buðu Akureyringum upp á hinn kunna breska þjóðarrétt Fish & Chips í tilefni sjómannadagsins í gær.

Veltufé frá rekstri móðurfélagsins nam rúmum milljarði krónaRekstrarhagnaður Samherja hf. á árinu 1999 var 200 milljónir króna samanborið við 706 milljónir króna árið 1998. Það er mun lakari afkoma en gert var ráð fyrir. Ástæður lakari afkomu má fyrst og fremst rekja til mjög slakrar afkomu DFFU, dótturfélags Samherja GmbH í Þýskalandi.

Aðalfundur Samherja hf. verður haldinn föstudaginn 7. apríl nk. í Nýja bíói á Akureyri og hefst hann kl. 14:00. Ársreikningur félagsins mun liggja frammi á skrifstofu félagsins 31. mars nk. Stjórn félagsins gerir tillögu um að greiddur verði 7% arður til hluthafa á árinu 2000 fyrir rekstrarárið 1999.

Afkomutölur Samherja fyrir árið 1999 verða birtar 20. mars n.k. en ekki 15. mars eins og áður hefur komið fram.

Kaupþing hf. seldi í dag 13,5% hlut í Samherja.  Kaupendur voru Fjárfestingafélagið Skel (6,53%), Fjárfestingafélagið Gaumur (3,43%) og Fjárfestingafélagið Fjörður (3,09%).

Í dag var skrokkur hins nýja fjölveiðiskips Samherja sjósettur í Gdansk í Póllandi. Stjórnendur fyrirtækisins fylgdust með athöfninni í blíðskaparveðri og gekk hún eins og best verður á kosið. Skipið mun bera nafnið Vilhelm Þorsteinsson EA-11 en því hefur þó ekki enn verið gefið nafnið formlega.

Í tímaritsviðtali sem birtist í gær er haft eftir Þorsteini Vilhelmssyni fyrrum útgerðastjóra og eins aðaleiganda Samherja hf. að fréttatilkynning sem gefin var út af félaginu 9. júní 1999 í tilefni af starfslokum hans hafi ekki verið sannleikanum samkvæm.

Í sjónvarpsfréttum í gær, þar sem fjallað var um ummæli Þorsteins Vilhelmssonar í tímaritsviðtali, var haft eftir framkvæmdastjóra Verðbréfaþings Íslands (VÞÍ) "að mál sem snúa að vísvitandi broti á upplýsingaskyldu hafi ekki komið upp hér á landi áður", eins og sagði orðrétt í umræddri frétt. Var þar vísað í fréttatilkynningu af starfslokum Þorsteins Vilhelmssonar.

Kaupþing hf. keypti í dag 21,6% hlut Þorsteins Vilhelmssonar í Samherja.   Bréfin voru keypt á genginu 10,67 og nemur kaupverð þeirra rúmlega þremur milljörðum króna.

Þessar skemmtilegu myndir af Vilhelmi Þorsteinssyni EA-11 voru teknar af Stefáni P. Haukssyni yfirvélstjóra s.l. laugardag (27. janúar) fyrir utan Krísuvíkurbjarg og sýna Vilhelm össla í land með rúm 2.400 tonn af loðnu um borð. Farminum var landað í Grindavík hjá Samherja - Fiskimjöl og lýsi þar sem hann fór í bræðslu. Fyrir áhugasama um skipið er vert að benda á vefsíðu sem Gunnar Gunnarsson háseti um borð hefur komið á fót. Þar er að finna ýmsar myndir og upplýsingar um skip og áhöfn. Slóðin er www.simnet.is/gunnig