Fréttir

Breytingar á skipastóli Samherja hf.:Samherji hf. hefur í dag gengið frá kaupum á Sléttbak EA-4 en skipið var áður í eigu Útgerðarfélags Akureyringa hf. Ennfremur hefur verið gengið frá sölu á Kambaröst SU 200 til útgerðar í Namibíu. Nettófjárfesting félagsins vegna þessara viðskipta er ríflega 100 milljónir króna.

Hið bráðefnilega lið UMF Óþokka Hið léttleikandi og skemmtilega fótboltalið Samherja, UMF Óþokki var einungis hársbreidd frá því að komast í undanúrslit pollamóts Þórs sem fram fór s.l. helgi á Akureyri. Má leiða að því líkum að liðið hefði komið sterkt inn í undanúrslitum og tvímælalaust skipað sér í verðlaunasæti. Liðið hefur enda á að skipa völdum leikmönnum í hverju rúmi og einvaldar liðsins ófeimnir að kaupa snjalla og reynslumikla menn. 

Samherji hf. tók á dögunum formlega í notkun SAP X-press Mannauðslausn fyrir starfsmannahald félagsins. Það eru hugbúnaðarlausnir Nýherja sem sjá um innleiðingu á lausninni, en mannauðslausnin er hluti af nýju SAP upplýsingakerfi sem Samherji hf. er að taka í notkun.

Fyrstu loðnunni sem skip Samherja veiða á nýhafinni loðnuvertíð var landað hjá Samherja í Grindavík fimmtudagskvöldið 27. júní. Það var Oddeyrin EA sem landaði 700 tonnum af loðnu sem skipið náði á Halamiðum vestur af landinu. 

Dómur var í dag kveðinn upp í héraðsdómi á eynni Storð í Noregi þar sem Samherji hf. var dæmdur til að greiða skaðabætur til norska ríkisins að fjárhæð 10 milljónir norskra króna, jafnvirði 117 milljóna íslenskra króna, fyrir að hafa sýnt gáleysi, - þó ekki stórkostlegt gáleysi - í samskiptum við skipasmíðastöðina Th. Hellesöy í Noregi og hafa þannig átt þátt í að ríkissjóður Noregs styrkti skipasmíðastöðina ranglega vegna smíði íslenska fjölveiðiskipsins Vilhelms Þorsteinssonar EA 11. Samherji hefur ákveðið að áfrýja dómi þessum. Gera má ráð fyrir að málið verði tekið til meðferðar fyrir í Gulaþingsrétti í Bergen á fyrri hluta næsta árs. Dómsstigin í Noregi eru þrjú.

Starfsmenn Samherja á Eyjafjarðarsvæðinu eru nú hátt í sex hundruð og fjöldi starfsmanna innanlands vel á áttunda hundraðið. Það er því óhætt að segja að starfsemi Samherja á Eyjafjarðarsvæðinu sé stóriðja á sínu sviði – ígildi risaálvers!

Út er komið fréttabréfið Stímvaktin, fréttir frá Samherja hf., 1. tbl. 6. árg. Blaðinu verður dreift inn á öll heimili og til fyrirtækja á Eyjafjarðarsvæðinu auk hluthafa félagsins. Í fréttabréfinu er meðal annars sagt frá rekstrarafkomu Samherja fyrstu þrjá mánuði þessa árs, farið ítarlega yfir starfsemi fyrirtækisins í landi og fjallað um breytingar og endurnýjun á skipastól félagsins. Stímvaktin er einnig aðgengileg á pdf-formi hér...

Nýtt framleiðslumet í rækjuvinnslunni var sett í liðinni viku þegar framleidd voru rúm 105 tonn af pillaðri rækju. Aðeins tvisvar áður hefur vikuframleiðslan farið yfir 100 tonn, mest 103 tonn í mars á þessu ári.

Fyrsti kolmunnafarmurinn sem landað er á Suðurnesjum á þessu ári kom til verksmiðju Samherja í Grindavík á mánudag. Það var Bergur VE sem landaði í Grindavík 1.200 tonnum af kolmunna sem fengust á fjórum sólarhringum í Rósagarðinum og á Hvalbakssvæðinu austur af landinu. 

Það verður mikið um dýrðir á Akureyri um helgina eins og alltaf í kringum sjómannadaginn, hátíðahöld bæði á laugardag og sunnudag. Skip Samherja eru að tínast í land eitt af öðru fyrir helgina.