Fréttir

Stjórn Sæsilfurs hefur ákveðið að setja ekki laxaseiði í sjó á vori komanda. Ákvörðunin hefur það í för með sér að slátrun á árinu 2007 verður innan við 500 tonn hjá félaginu og að engin laxaframleiðsla verður árið 2008. Til samanburðar má geta þess að áætlað er að slátra um 4.000 tonnum af laxi hjá Sæsilfri á yfirstandandi ári. Sæsilfur er í meirihluta eigu Síldarvinnslunnar hf. og Oddeyrar hf., dótturfélags Samherja hf.

Árið 2005 er metár í sögu landvinnslu Samherja á Dalvík. Framleitt var úr 10.483 tonnum af hráefni, samanborið við 9.588 tonn árið áður, sem þá var met. Aukningin er rúm 9% á milli ára. Um 120 stöðugildi eru hjá landvinnslunni á Dalvík.

Jól í Barentshafi Vesturvon, sem gert er út af Framherja í Færeyjum, fór til veiða undir skipstjórn Eyðuns á Bergi, í byrjun desember.  Eyðun á Bergi er vel þekktur meðal íslenskra sjómanna en hann var skipstjóri á Akrabergi í 11 ár. Auk hans eru 30 manns í áhöfn og er reiknað með að veiðiferðinni ljúki í byrjun febrúar.

Aðalsteinn Helgason, framkvæmdastjóri þróunarsviðs Samherja hf., hefur verið ráðinn framkvæmdastjóri Síldarvinnslunnar hf. í Neskaupstað og mun hann taka við nýja starfinu þann 1. janúar 2006.

Í dag var haldinn fundur með starfsmönnum Samherja á Akureyri vegna málefna Strýtu, rækjuvinnslu Samherja, en fyrr í vikunni var haldinn fundur með trúnaðarmönnum og fulltrúum stéttarfélagsins Einingar-Iðju um sama mál. Vegna versnandi rekstrarumhverfis í rækjuvinnslu á Íslandi hefur verið ákveðið að starfrækja aðeins eina vakt í framleiðslunni í stað tveggja áður og reyna þannig að tryggja áframhaldandi rekstur Strýtu. Ákvörðunin hefur í för með sér að segja verður upp um það bil helmingi starfsmanna verksmiðjunnar, en í dag vinna rúmlega 60 manns hjá Strýtu. Samherji mun aðstoða viðkomandi starfsmenn við að finna störf við hæfi.

- Söluverðmæti afurða fjölveiðiskipa Samherja hf.á síldarvertíðinni um tveir milljarðar króna Fjölveiðiskip Samherja hf., Baldvin Þorsteinsson EA 10 og Vilhelm Þorsteinsson EA 11, komu með fullfermi til Akureyrar í dag að lokinni vel heppnaðri síldarvertíð, en bæði skipin eru nú búin með aflaheimildir sínar úr norsk-íslenska síldarstofninum. Frá því síldarvertíðin hófst þann 10. maí sl. hafa skipin veitt samanlagt um 39.000 tonn af síld úr sjó. Úr aflanum hafa áhafnir skipanna unnið tæplega 20.000 tonn af frystum afurðum og nemur söluverðmæti þeirra nálægt tveimur milljörðum króna.

Sigursteinn Ingvarsson hefur í dag verið ráðinn fjármálastjóri Samherja hf. og tekur við starfi fráfarandi fjármálastjóra Guðmundar Baldvins Guðmundssonar.  Sigursteinn mun hafa umsjón með rekstri fjármála- og upplýsingasviðs Samherja hf.

Samherji hlaut Íslensku sjávarútvegsverðlaunin 2005 fyrir framúrskarandi fiskvinnslu. Verðlaunin voru afhent við hátíðlega athöfn síðdegis í dag í Gerðarsafni í tengslum við Íslensku sjávarútvegssýninguna sem nú stendur yfir.

Guðmundur Baldvin Guðmundsson, fjármálastjóri Samherja hf., hefur sagt starfi sínu lausu frá og með 1. október nk.

Samherji hf. var rekinn með 1.065 milljón króna hagnaði á fyrri helmingi ársins 2005 en hagnaður á öðrum ársfjórðungi var 390 milljónir króna.