Fréttir

Á árinu 2010 greiddi Samherji hf. 5.300 milljónir króna í laun og launatengd gjöld. Hækkun á milli ára nam samtals 1.200 milljónum króna. Af þessari hækkun fengu starfsmenn Samherja hf. 450 milljónir í sinn hlut en ríkið, lífeyrissjóðir og stéttarfélög 750 milljónir.

-Yfirlýsing frá Þorsteini Má Baldvinssyni
Í gærkvöld boðuðu bæjaryfirvöld á Akureyri ásamt Samtökum atvinnurekenda á Akureyri og Verkalýðsfélögunum
í Eyjafirði til opins fundar í Menningarhúsinu Hofi til að ræða áhrif breytinga í sjávarútvegi á annan atvinnurekstur og
þjónustu í Eyjafirði. Fundurinn var vel sóttur (um 250 manns), framsöguerindin upplýsandi og umræðurnar á eftir ekki síður
athygliverðar.

Samherji hf. boðaði til móttöku síðdegis í dag í Flugsafni Íslands á Akureyri og afhenti við það tækifæri styrki til ýmissa samfélagsverkefna á Eyjafjarðarsvæðinu upp á 75 milljónir króna. Flestir styrkirnir eru gagngert veittir til að efla barna- og unglingastarf í íþrótta- og æskulýðsfélögum á Eyjafjarðarsvæðinu.

Vilhelm Þorsteinsson EA 11 kom í land með fullfermi af frystum síldarflökum í gær og lauk þar með síðustu veiðiferð þessa árs. Áhöfnin á Vilhelm Þorsteinssyni er búin að veiða um 50.000 tonn og skilar þjóðarbúinu um 3,3 milljörðum kr. á þessu ári, sem er met í aflaverðmæti.  

Sjómenn á fimm skipum Samherja hf., Björgúlfi, Björgvin, Vilhelm þorsteinssyni, Oddeyrinni og Snæfelli hafa afhent styrki til þriggja aðila á Akureyri, alls um 1.430 þúsund krónur.

Björgúlfur EA 312 kom til heimahafnar á Dalvík í dag með fullfermi eða 115 tonn af fiski.  Uppistaðan er þorskur sem fer beint til vinnslu í frystihúsinu á Dalvík.  Aflaverðmæti í túrnum eru rúmar 25 milljónir króna.  Með þessari löndun hefur Björgúlfur veitt fyrir yfir 1000 milljónir króna á árinu og er það í fyrsta skipti sem skipið veiðir fyrir meira en milljarð á einu ári. Í tilefni af þessum tímamótum var áhöfninni færð  rjómaterta við heimkomuna.

Samherji hf. hefur ákveðið að greiða starfsmönnum í landi 260 þúsund króna launauppbót nú í desember, til viðbótar umsaminni 46 þúsund króna desemberuppbót. Þetta er í annað skiptið á árinu sem Samherji greiðir uppbót á laun. Starfsmaður í fullu starfi fær því samtals 320 þúsund króna aukagreiðslur á árinu. Þetta er jafnframt annað árið í röð sem Samherji greiðir um 300 starfsmönnum eingreiðslur umfram kjarasamninga.

Stærsta skip íslenska fiskiskipaflotans Kristina EA 410 kom til hafnar á Akureyri í morgun eftir vikulanga siglingu frá Las Palmas. Skipið mun á næstu dögum halda til síldar- og makrílveiða hér við land.

Samherji hefur ákveðið að greiða öllum starfsmönnum í landi 60 þúsund króna viðbótar orlofsuppbót. Uppbótin verður greidd með launum um næstu mánaðamót og bætist við umsamda orlofsuppbót sem greidd er á sama tíma."Þetta er í þriðja skiptið á rúmu ári sem Samherji greiðir starfsfólki sínu launauppbót umfram kjarasamninga. Við ákváðum í fyrra, þegar hækkunum kjarasamninga var frestað, að bæta okkar fólki það upp með launauppbótum í formi eingreiðslna. Við viljum þakka fólkinu okkar fyrir frábært starf á liðnum vetri og vonum að veðurguðirnir sláist í lið með okkur að gera sumarið að þeim sælutíma sem það á að vera," segir Gestur Geirsson, framkvæmdastjóri landvinnslu Samherja.

Samherji hf. og Síldarvinnslan hf. í Neskaupstað hafa nýverið gert samning um kaup Síldarvinnslunnar á uppsjávarveiðiskipinu Margréti EA 710. Skipið verður afhent nýjum eiganda seinnihluta maí mánaðar.  Samherji hf. óskar Síldarvinnslunni og nýrri áhöfn velfarnaðar í rekstri skipsins. Nánari upplýsingar eru á heimasíðu Síldarvinnslunnar www.svn.is