Fréttir

Landssamband íslenskra útvegmanna hefur gefið Háskólanum á Akureyri fullkomna neðansjávarmyndavél sem afhent var við hátíðlega athöfn í skólanum í gær. Það var Björgólfur Jóhannsson, formaður LÍÚ sem afhenti Þorsteini Gunnarssyni, rektor Háskólans gjöfina, en í máli hans kom fram að hér er um að ræða afar fullkomið tæki sem skapar byltingarkenndar  umbætur á tæknilegri rannsóknagetu neðansjávar. 

Fréttatilkynning frá Samherja: Stjórn Samherja hf. samþykkti á fundi sínum í dag að kaupa 65% hlutafjár í þýska útgerðarfélaginu CR Cuxhaven Reederei GmbH, en fyrir átti félagið 35% eignarhlut í félaginu. Kaupverð nemur 17,3 milljónum evra. Jafnframt samþykkti stjórnin kaup dótturfyrirtækisins Onward Fishing Company Ltd. á 50% hlut í Boyd Line Ltd í Hull. Kaupverð 50% hlutar í Boyd Line nemur um 6,5 milljónum punda. Veiðiheimildir þeirra fjögurra fyrirtækja í Evrópusambandinu sem Samherji á nú aðild að nema um 20 þúsund þorskígildistonnum og er helmingur þessara veiðiheimilda eða um 10 þúsund tonn þorskur. Til samanburðar má geta að veiðiheimildir Samherja á Íslandsmiðum nema um 25 þúsund þorskígildistonnum.

Skip tengd Samherja hf. hafa verið við veiðar á Svalbarðasvæðinu að undanförnu.  Að sögn Brynjólfs Oddssonar skipstjóra á frystitogaranum Kiel hefur veiðin verið jöfn og stöðug og afar góð á undanförnum dögum. 

Akureyrin EA 110 lagðist drekkhlaðin að bryggju á Akureyri í morgun með um 565 tonn af frosnum afurðum, aðallega ufsa.  Aflinn var alls um 1.090 tonn en aflaverðmæti afurðanna er um 95 milljónir króna.

Sex mánaða uppgjör Samherja hf.:Samherji hf. var rekinn með 1.098 milljón króna hagnaði á fyrri árshelmingi  2004 en hagnaður á öðrum ársfjórðungi var 460 milljónir króna.

Vilhelm Þorsteinsson EA 11: Svalbarði var vettvangur áhafnarskipta hjá Vilhelm Þorsteinssyni EA 11, fjölveiðiskipi Samherja hf., í síðustu viku. Var þetta í fyrsta skipti sem leiguflugvél er send til Longerbyen á Svalbarða í þessum erindagjörðum. Flugvél frá Flugfélagi Íslands lagði upp frá Akureyri með nýja áhöfn áleiðis til Longerbyen og tók flugið um 5 klukkutíma með viðkomu í Tromsö. Daginn eftir var síðan flogið til baka án millilendingar og voru skipverjar ánægðir við heimkomuna á Akureyrarflugvöll eftir langt úthald. Í áhöfn Vilhelms eru að jafnaði 26 menn.

Breytingar á skipastól Samherja hf. Samherji hf. hefur gengið frá kaupum á frystitogaranum Akrabergi frá Framherja Spf. í Færeyjum, sem er að þriðjungshlut í eigu Samherja.  Í kaupsamningi um skipið er ákvæði um skilarétt innan 3ja mánaða frá undirritun.  Akrabergið fær einkennis-stafina EA-410.  Í áhöfn skipsins eru 28 menn og skipstjóri er Eydunn á Bergi, sem verið hefur skipstjóri skipsins um árabil. Skipið hélt í gærkvöld á úthafskarfaveiðar. 

Þýski togarinn Wiesbaden NC,  kom inn til hafnar í Reykjavík föstudaginn 9.júlí s.l. með rúm 600 tonn af úthafskarfa, eftir 39 daga veiðiferð.   Afurðirnar fara að mestu á markaði í Japan.  Skipið var á veiðum á Reykjaneshrygg, utan íslenskrar lögsögu.   Að sögn Haraldar Grétarssonar framkvæmdastjóra DFFU var skipstjórinn Flosi Arnórsson í sinni annarri veiðiferð á flottrolli en fyrstu veiðiferð sem skipstjóri og verður þetta að teljast góður árangur hjá hinum nýja skipstjóra.  Í áhöfn eru 33 menn, að mestum hluta pólverjar.Wiesbaden er gerður út af Atlantex, pólsku dótturfyrirtæki  DFFU sem er hlutdeildarfélag Samherja hf. og siglir togarinn því undir pólsku flaggi.